Баланның файдасы зур

25 октября 2023 г., среда

Баланда С витамины лимоннан 1,5 тапкыр күбрәк. Анда аскорбин кислотасын үзләштерергә ярдәм итүче Р витамины да бар. Шуңа салкын тигәндә баланның файдасы зур. Грипп эпидемиясе, салкын тидерү куркынычы булганда балан белән дәваланырга була.

Балан — табигый антисептик. Тамак авыртканда балан согы яки төнәтмәсе белән чайкарга мөмкин.

К витаминына бай булу сәбәпле, йөрәк һәм кан тамырларын чистарта, кан басымын төшерә. Гипертониядән интегүчеләр балан белән дуслашсын.

Игътибар итсәгез, баланның орлыклары да йөрәк формасында, табигать үзе аның сихәтен сиздерә.

• Балан тынычландыру үзлегенә ия. Йокларга ятар алдыннан 1 стакан балан морсы эчсәгез, тынычлап йокларсыз.
• Баланда А витамины күп, ул күз күремен яхшырта. Әмма бета-каротин үзләштерелсен өчен май кирәк. Балан артыннан бер кашык каймак кабып куярга онытмагыз.
• Балан эч китүне дә туктата. Агулану, энтерит, колиттан ярдәм итә.