Бәрәңге (кәбестә) тәкәсе
Бәрәңге (кәбестә) тәкәсе
Тәкә – эченә нинди дә булса яшелчә яки җиләк-җимеш салып ясалган камыр ашы. Читләрен чеметеп, бөрмәләп ябыштыргач, тәкә мөгезен хәтерләткән бизәк килеп чыга. Мөгаен, ризыкның исеме шуннан килеп чыккандыр.
Рецепт авторы – Әлфия Заһретдинова (Әгерҗе шәһәре).
Ингредиентлар:
Бодай оны – 450 г
Кефир – 200 г
Үсемлек мае – 125 г
Тоз – 2 г
Чәй содасы – 1 г
Камырның массасы: 700 г
Бәрәңге – 600 г
яки башлы кәбестә – 550 г
Тоз – 6 г
Төелгән кара борыч – 0,5 г
Эчлекнең массасы: 500 г
Чыгышы: 100 г, 10 данә
Кефирга үсемлек мае, тоз, сода, он кушып, йомшак итеп камыр басалар, аны 30–40 минут ял иттерәләр.
Баскан камырны 70 г кисәкләргә бүлеп, диаметры 12 см булган җәймәләр җәяләр, бу җәймәләрнең уртасына 50 г эчлек салалар һәм кырыйларын уртага җыеп, буйдан-буйга бөрмәләп ябыштыралар. 200 °С кадәр җылытылган духовкада, алтынсу төскә кергәнче, 30 минут чамасы пешереп алалар.
Бәрәңге эчлеген ясау өчен: әрчелгән бәрәңгеләрне шакмаклап турыйлар һәм салкын су белән чайкыйлар.
Кәбестәдән эчлек ясау өчен: кәбестәне ваклап турыйлар һәм тоз белән уалар. Тәкәне формалаштырыр алдыннан, эчлеккә тоз, борыч салалар.
Әзер тәкәләрне аркылыга кисеп, эчлеген өскә каратып куялар, эретелгән кайнар ак май сибеп, бер-берсе өстенә өяләр. Табынга кайнар килеш бирәләр.