Кооператорлар тарафыннан авыл халкыннан көн саен уртача 7 тонналап сөт җыела
Авыл җирендә терлек асрамыйча көн күрүне күз алдына китерүе дә кыен. Аеруча сыер малы авыл кешесенең төп туендыручысы санала. Ләкин ул сый табынга килеп ирешкәнче авыл кешесенә никадәр борчу-мәшәкать кичәргә, күпме тырышырга туры килүен мал асраган кеше генә беләдер.
- Абзар тирәсендәге эш һәркемгә дә җитә ул. Көн саен таң белән торабыз, сәгать дүрт тулганчы үк маллар янына чыгабыз. Мал карарга балалар да булыша: асларын да җыештыралар, сөтләрен дә сөзәләр. Сөтне кая урнаштырырга дип тә баш катырасы юк - кооператорларыбыз җыеп тора, - дип уртаклаша Тимершык авылы халкы.
Чыннан да, Саба районы кооператорлары тарафыннан авыл халкыннан көн саен уртача 7 тонналап сөт җыела, аннан суытып эшкәртүгә озатыла. Продукция тапшыручылар белән вакытында исәп-хисап ясала. Моннан тыш кош-корт үстерү белән дә шөгыльләнәр кооперативта. Капиталь ремонтланган 500 квадрат метрлы торакта инкубатор ясап, 70 мең чеби үстерәләр. Район халкына каяндыр кош-корт эзләп йөрисе юк, якын. Бройлерларга ерактан – Ульяннан, Мари Иленнән дә киләләр. Райпо халыктан мөгезле эре терлек тә сатып ала һәм ярминкәләрдә сатып, акчасын кайтарып бирә. Пайчылар уставын бозмыйча, халык белән бергә эшлиләр кооперативта.
